Ligaya

Ang mga sandaling ikaw ay kapiling
Tugon ni Bathala sa ‘king panalangin;
Dininig ang aking mataimtimang hiling
Upang ako’y malango sa aking giliw.

Ang mga minutong tayo’y magkaakbay
Higit pa sa pagbubunyi ng tagumpay
Ang mga labi natin ay magkaramay
Sa pagsasalo ng kagalaka’t lumbay.

Ang mga oras ay inuubos natin
Habang ang ating mga mata’y nakatingin;
Sa ating sariling liwanag at ningning
Hanggang katawan ay matunaw sa dilim.

Hindi ko batid kung ika’y minamahal,
Lalong di alam kung ako’y iyong mahal.
Sa araw-araw isa lamang ang alam
Ikaw ang ligaya na ‘king inaasam.